الشرطة في خدمة الشعب تاني

حسن عنده امتحان في شركة و بيحاول يدور علي ركنه في ميدان الخرطوم امام كلية الطب واخيراً وجد مكان..في المرأة لاحظ ان شخص جاي يجري عليه ..
الشخص:بتعمل ايه يا استاذ ؟
حسن : يعني حكون بعمل ايه...بركن العربيه
الشخص : ميمفعش تركن هنا
حسن : ليه يعني ؟ امال اركن فين
الشخص:اركن في اي حته تانيه عشان ده محجوز
حسن : يعني ايه محجوز و انتا مين اساساً ؟ بقولك ايه انا مستعجل و اخلع من دماغي
الشخص: انا السايس هنا هو انت مستغني عن عربيتك و لا ايه ؟
حسن محتداً: انتا بتهددني و لا ايه ؟ اروح اجيبلك عسكري يشدك ؟
الشخص: انتا حتعملي فيها وطني وريني تقدر تعمل ايه
حسن بعد ان لاحظ انه مش همه:بقولك ايه ؟ انتا ملكش غير حسنتك و خلاص سيبني بقي عشان انا مستعجل
الشخص : سيب الهند بريك عشان إحتمال احركها
حسن ساب الهند بريك و قفل العربية و هو يلعن مهنة البلتجة الي اصبحت منتشرة و ترك التفكير في كيفية الإنتقام إلي ما بعد الإمتحن.
بعد الإمتحان خرج حسن و هو متعكنن اخر عكننه لأنه نيل الدنيا في الإمتحان و قرر انه يروح يطلع نفخه كله علي السايس ..بل انه قرر انه يمسكه يطحنه علقة..ولكن بعد تفكير قرر انه يعمله محضر..ثم سأل اول عسكري وجده عن وجود ظابط قريب من هنا فقرر العسكري انه يوجد ظابط علي بع 50 متر بس من الموقعة فتوجه له و دار الحوار الأتي :...
حسن: السلام عليكم
الظابط: و عليكم السلام
حسن : من فضلك فيه واحد سايس هنا عامل بلتجي و بيبجح في الي ييجي يركن
الظابط : و بعدين؟
حسن : كنت بسأل ساعتك إن كان ممكن تبت معايا عسكري من الي وقفين يخوفه شويه عشان ميعملش كده مع حد تاني
الظابط: للإسف اصل ده مش تبعي ..ده تبع حي شرق
حسن: حضرتك ده علي بعد 50 متر اهو هناك
الظابط: مانا قلتلك انه مش تبعي..ممكن تروح قسم باب شرقي و هما حيبعتوا معاك عسكري يديه علي قفاه و يعلمه الأدب .
حسن شكر الظابط و هو منفوخ من البلد الوسخه دي و راح راكب عربته و مشي من سكات

الشرطة في خدمة الشعب

مساء احد الأيام اتصل حسن بخطيبته هناء للخروج وذهب لها في الموعد و انطلقو ا بالسيارة السويفت علي شاطي الكورنيش و علي الرغم من اعمال التوسعة في الكورنيش إلا انه كان رائع كالعادة.حسن انسان متحضر و مثقف ويقود سيارته بإعتدال حتي إذا وجد مطبات علي الكورنيش فيبطء من سير السيارة و يشغل اضواء الإنتظار . و في احد المطبات تصرف حسن كالمعتاد أبطء من سير السيارة و شغل اضواء الإنتظار الإ ان صوت من خلفه دوي (بوووووم) و اهتز حسن و خطيبته داخل السيارة ثم نزل من السيارة ليري ما حدث و هو يحدث نفسه بأن اكيد واحد حمار خبط فيه من ورا .....
حسن: ايه ياعم الي انتا عملته ده ..كده كسرت اكصدام العربيه !
الحمار بصوت عالي :فيه حد يفرمل مره واحده كده !
حسن : مانتش شايف ..الأرض مكسره و بعدين انا مدي انتظار ...انتا مبتشفش ؟
الحمار و هو متجه لسيارته : ناس اغبيا
حسن يجري ورائه في اتجه سيارته : رايح فين ؟ و الأكصدام الي كسرته ده
الحمار: ابقي خد نمرة العربيه انتا مش عارف انا مين ؟
حسن ادرك انه لن يفيده شيء الإشتباك مع الرجل في خناقه بالأيدي خصوصاُ انه معه خطيبته و لا يعرف نتائج خناقة زي دي ممكن تكون ايه ..طب و الحل ...فكر في انه لازم يعمله محضر فتوجه لأقرب نقطة شرطة و دار الحوار الأتي....
حسن: السلام عليكم
الصول : عليكم السلام
حسن: في ظابط جوه من فضلك
الصول: ايوه ايهاب بيه جوه
حسن خبط علي باب ايهاب بيه : السلام عليكم
ايهاب بيه: و عليكم السلام...خير ؟
حسن: عاوز اعمل محضر لواحد خبط عربيتي من ورا
إيهاب بيه: و ده فين الكلام ده ؟
حسن :علي البحر في استنلي
إيهاب بيه : و عربيتك حصل فيها ايه ؟
حسن: الإكصدام اتدغدغ
إيهاب بيه:وبكام الإيكصدام ده ؟
حسن: حوالي 100 جنيه
إيهاب بيه : عاوز نصيحتي ؟
حسن :ايوه طبعاً
إيهاب بيه: كبر دماغك و روح اشتري واحد جديد.انا ممكن اعملك المحضر بس مش حيفيد بحاجه إلا لو كنت مأمن علي العربيه
حسن: يعني حضرتك رأيك كده ؟
إيهاب بيه: انا بقولك الصراحه
حسن مستاءً من الصراحه:طيب انا شاكر ليك جداً ...السلام عليكم